La konvivensia entre las tres kulturas en Espanya
Enshemplo i modelo para muestros dias

por Moshe Shaul

("Aki Yerushalayim" No. 50, 1995)

 
 
Para el puevlo djudio exilado por los romanos de su tierra, Espanya no fue solamente, i sigun las palavras de Unamuno un "nido de consolacion, onde pudo yorar a Sion", sino ke tambien un paiz onde, kon todos los inkonvenientes de una minoria relijioza tolerada a vezes i persekutida otras vezes, konosio tambien periodos bastante largos de konvivensia i kolaborasion kon las sosiedades al seno de las kualas bivia, yegando a un grado de integrasion sosiala i kulturala ke no fue igualada en ningun otro paiz de la Diaspora.

Fue esta konvivensia ke permetio a los djudios de Espanya de yegar asta los mas altos eskalones de la sosiedad en los reynados kristianos i muzulmanos ke podestaron en las diversas partes de este paiz, a lo largo de la istoria. Eyos pudieron tambien kontribuir a sus prosperidad i dezvelopamiento - sea en el kampo de la ekonomia i sea tambien en los kampos de la politika, administrasion, sensia i kultura i mizmo en el kampo de la batalia, sigun fue echo por enshemplo por una de las mas ilustres figuras de la Espanya Djudia de akeyos tiempos, Shemuel Ibn Nagrela, konosido tambien komo Shemuel Anagid. El fue no solo vizir i konsejero de 2 sultanes de Granada sino ke tambien gerrero ke kombatio en el kampo de batalia, akompanyando al sultan en sus kampanyas militares, lider de la komunidad djudia de Granada, i tambien poeta ke supo ekspresar en sus ermozos poemas en lengua ebrea, sus mas intimos sintimientos de amor, de alegria i de pena i angustia.

Shemuel Anagid no fue el solo a distingirse en estos kampos. Lo presedo komo konsejero del sultan, Hasday Ibn Shaprut ke bivio en Cordoba en la epoka de su mas grande esplendor i supo aprovechar su pozision i su influensa para dar un grande impulso a la vida relijioza, kulturala i intelektuala de los djudios de Espanya. En el kampo de la kreasion relijioza, filozofika i medikala tambien se distingio en akeya epoka rabi Moshe Ben Maymon, el Maimonides, ke nasio en Cordoba ma duvo exilarse de ayi, bivio unos kuantos anyos en Maroko i se aresento definitivamente en Ejipto onde kreo sus ovras maestras, las simientes de las kualas fueron pozadas en Espanya. I podriamos adjustar a estos nombres toda una pleyada de ilustres figuras del djudaizmo espanyol tales ke Yeuda Alevi, Shelomo Ibn Gabirol, Moshe i Avraam Ibn Ezra i mas ke se distingieron en los kampos de la kreasion literaria, de la filozofia i de la sensia oksidentales.

El fruto de la fruchiguoza kolaborasion entre las tres relijiones, las tres lenguas i las tres kulturas ke konvivieron en la Espanya de la Edad Media, fue el esktraordinario enfloresimiento kultural ke karakterizo a la Espanya de esta epoka, metiendola a la kavesera de los otros paizes de Evropa, no tanto komo potensia militara sino ke en los kampos de la sensia i kultura, komo por enshemplo la filozofia i la medesina, la matematika, la astronomia, la kartografia etc.

Sigun lo apuntimos, todas estas kontribusiones fueron posibles, en una mizura muy importante, grasias a la atmosfera de konvivensia i de toleransia mutuala ke karakterizo a la Espanya de la Edad Media, konosida tambien - djustamente a kavza de esta partikularidad - komo la Espanya de las Tres Relijiones o la Espanya de las Tres Kulturas.

Dezgrasiadamente esta konvivensia fue interompida por la ekspulsion de los djudios de Espanya, en 1492, i de los moros tambien a prinsipios del siglo 17 - ekspulsiones ke sigun lo afirman numerozos istoriadores espanyoles, kavzo grande danyo a Espanya tambien, en el kampo de la kultura no menos ke en el de la ekonomia.

Una de las demandas ke se azen numerozos intelektuales en Espanya, sovre todo komo konsekuensa de todo lo ke fue echo i eskrito ultimamente kon relasion al V Sentenario, una koza ke se demandan munchos es si esta konvivensia podria servir de modelo para los paizes onde biven oy dia puevlos kon relijiones i kulturas diferentes.

Una prova de responder a esta demanda fue echa en el II Festival de Teatro Medieval ke tuvo lugar entre el 28 i el 31 de Oktobre en la sivdad de Elche, en el sud de Espanya, organizado por la munisipalidad de esta sivdad en kolaborasion kon el Instituto Internasional de Teatro del Mediterraneo.

Este festival inkluyo, en desparte de un seminario de 3 dias sovre el Teatro Medieval en Muestros Dias, 3 mezas redondas sovre la konvivensia relijioza i kulturala ansi ke konsertos, resitales i espektakolos kon la partisipasion de kantadores, aktores i grupos folklorikos de Espanya, Maroko i Israel. Uvo, entre otras, un konserto del grupo Bustan Avraam de Haifa, formado por 3 muzisianos arabos i 4 djudios, ke prezentaron un manyifiko programa, kombinando de manera muy armonioza la muzika arabo- orientala i la djudia-oksidentala.

Uvo un konserto kon la partisipasion de un koro marokano i de un grupo folkloriko andaluz ke se ganaron eyos tambien los aplauzos de la asistensia, sovre todo kon la ultima parte de sus programa, en la kuala kantaron djuntos i en perfekta armonia kantes del folklor marokano i del andaluz tambien.

El tema de la konvivensia entre las tres kulturas fue debatido en tres mezas redondas kon la partisipasion de intelektuales espanyoles i reprezentantes de la iglezia katolika en la sivdad de Aquila, en Italia ansi ke de la komunidad djudia de Espanya, de un profesor palestiniano ke ensenya en la Universidad Complutense de Madrid, del Direktor del Sentro de Investigasion de la Kultura Otomana i Moriska, en Tunisia, i otros mas. Yo partisipi, sovre la invitasion del direktor del Festival, afin de avlar de la kultura de los djudios de Espanya i de sus desendientes despues de la ekspulsion, los sefaradis.

Rezultados tan provechozos para la kultura de Espanya ansi ke para la sivilizasion mundiala - puede i deve servir de modelo en muestros dias tambien, ainda mas i mas en akeyos paizes, komo Israel por enshemplo, onde ay konfliktos entre puevlos de relijiones i kulturas diferentes, ke podrian bivir djuntos en paz i kontribuir, kada uno de su parte, a sus prosperidad i kulturas respektivas ansi ke a la del mundo entero tambien.
 



History of the Sephardic Jews Main Page
Judeo-Spanish Language Main Page

Modern Romance Languages Main Page
Orbis Latinus Main Page

This page is part of Orbis Latinus
© Zdravko Batzarov