"Djudios muevos" del nordeste brasiliano:
El eterno retorno del reprimido

por Caesar Malta Sobrei

(Aki Yerushalayim,  Anyo 15, (1995), No.  49.)


 
Dedikado a:

Sarah Tikva Toledo-Sobreira
Rab.Jacques Cukierkorn
Mestre Haim Samuel Katz
Prof. Dr. Joseph Levy

Desde los anyos 60 esta akontentesiendo un fenomeno kuriozo: el deskuvrimiento de lugares, en diversas partes del mundo, onde biven djudaizantes, kristianos konsientes de sus raizes djudias i ke bushkan a retornar a la relijion de sus antepasados. Al prinsipio de la dekada de los 60 se deskuvrio ke en la rejion portugeza Tras-Os-Montes existian komunidades enteras de kristianos-muevos djudaizantes. En Palma de Mallorca en Espanya paso lo mizmo kon los "chuetas", algunos de los kualos ya estan admitiendo aviertamente sus raizes djudias.

En Almanya, onde ensenya sensias politikas en la Universidad Libre de Berlin, el prof. Ignacio Sotelo se deklaro djudaizante i proklamo su retorno al djudaizmo en las pajinas de la revista espanyola "Cambio XVI". En el Nordeste de Brasil, un pastor luterano del Estado de Rio Grande do Norte, Joao Medeiros, torno al djudaizmo djuntos kon su famiya i sus amigos a traves de una "rekonversion" sovre la kual fue publikado un ancho reportaje en la revista "Veja" la mas importante del paiz. En Sao Paulo, Helio Daniel Cordeiro fundo la "SHEMA" - sosiedad ebraika para el estudio del marranizmo i empesa un lavoro de difuzion del djudaizmo entre los desendientes de los kristianos muevos.

En Brasilia,  en esta mizma epoka, Sonia Bloonfeld Ramage, prezento una teza de M.A.  en el departamento de antropolojia de la Universidad de Brasilia, basho el titulo "La Fenix de Abraham: Identidad Judia en el Nordeste Brasilenyo".

En Cincinnati, Ohio, (U.S.A.), el rabino Jacques Cukierkorn prezento su teza sovre los "Djudios-muevos" del Nordeste Brasiliano en el Hebrew Union College. En la revista Aki Yerushalayim de Israel, es publikado el artikolo de Rachel Amado Bortnick "Retorno al Djudaizmo despues de 500 anyos: Istoria sovre Vivensia, Koraje i Esperansa" onde se konta sovre el retorno al djudaizmo de desendientes de kristianos-muevos  en Uruguay i en Mexico. Oy se puede konstatar el fenomeno de rekonversion al djudaizmo del marranizmo i de rekonversiones al djudaizmo komo un echo mikro sosiolojiko. De tal manera ke profesores i investigadores de institusiones diversas komo por enshemplo universidades Maimonides i de Tucuman (Argentina), universidades de Sao Paulo, Rio de Janeiro i Rondonia (Brasil), universidades de Tel Aviv i Yerushalayim ansi ke el Instituto Spinoza (Israel), universidades Pontificia i Civil, de Salamanca, universidad Nacional (Chile), universidad de Quebec en Montreal (Canada) etc., estan mostrando intereso en anchear sus konosensias sovre el tema de los "djudios-muevos".

En el nordeste de Brasil, el sentro del "fenomeno marrano" se situa en la sivdad de Caico, en el estado del Rio Grande do Norte. Desde los anyos 70 esta sivdad atira la atension de los investigadores del djudaizmo en segito a las investigasiones echas por un saserdote, el Padre Antenor Salviano de Araujo, ke demando del ken era entoses gran rabino de Sao Paulo, el rabino Fritz Pinkuss de embiar un eksperto para azer una evaluasion de la "erensia djudia" de su sivdad.

El rabino embio a la Profesora Anita Novinsky de la Universidad de Sao Paulo ke izo investigasiones i pudo konstatar la existensia en Caico de provas etnografikas ke konfirman la sospecha del Padre Salviano.

Dos anyos atras, el rabino Jacques Cukierkorn izo un estudio en toda la rejion del Vale do Serido, onde esta la sivdad de Caico i entrevisto ayi a numerozas personas para yegar a la konkluzion ke ay indikasiones sovre el pasado djudio de  una buena parte de la povlasion lokala. El rabino vijito en las sivdades de Natal (kapitala del estado), Mossoro, Apodi, Filguiera, Sao Francisco d'Oeste, Caraiba, Sao Miguel, Jardim das Piranhas, Carnauba dos Dantas i prinsipalmente Caico.

En sus investigasiones el deskuvrio ke Jose Nunhez Cabral de Carvalho (1913-1979) fue el pioniero i reorganizador de la komunidad marrana del Rio Grande do Norte. En Natal, el rabino entrevisto a Joao Medeiros ke, komo lo dishimos, se rekonvertio al djudaizmo despues de aver bivido komo katoliko i, mas tadre protestante. El Padre Salviano ke fue tambien entrevistado konto ke sus investigasiones en el periodo entre 1973-1989 le konfirmaron ke Caico fue en el pasado el sentro de numerozos marranos ke se avian aresentado en el Vale do Serido afin de poder djudaizar sin peligro.

En la sivdad de Carnauba dos Dantas Jacques Cukierkorn entrevisto a Helder Baruh do Nascimento ke le aseguro ke la povlasion de la sivdad no kome karne kon sangre, segun esta enkomendado en la Tora. En Picui el rabino entrevisto varias personas para poder konfirmar una informasion dada por Jose Nu¤ez Cabral de Carvalho, ke la iglesia de Picui avia sido fraguada sovre las ruinas de una antigua sinagoga. El no pudo konfirmar esta informasion ni niegarla. Para aklarar esta kestion kale azer una ekskavasion arkeolojika en la iglesia.

En Natal el rabino enrevisto al injeniero Joao Medeiros, mensionado de antes segun el kual sus padres i avuelos siempre afirmaron ke eran djudios marranos: "Mi padre no me desho ir a la eskola publika porke la ensenyansa era katolika -- afirma Medeiros, adjustando ke -- el kura defendio al lechero de vender leche a muestra famiya siendo ke sospechava ke eramos katolikos por afuera ma djudios por adientro."

Joao Medeiros se konvertio mas tadre al protestantizmo i devino pastor de una iglesia evanjelika. El profundizo entoses sus estudios del Antiguo Testamento i poko a poko konfirmo su erensia djudia asta el punto ke, konvensido de la nesesidad de tornar al djudaizmo, izo un viaje a Rio de Janeiro  para demandar su rekonversion a la relijion de Moshe, en lo kualo fue ayudado por el rabino Lemle, desde entonses el es uno de los mas ardientes defensores de la salvasion del djudeo marranizmo en el Nordeste Brasiliano. Oy la komunidad djudia del Rio Grande do Norte tiene 12 famiyas, de las kualas 8 son marranas rekonvertidas, i 10 miembros solteros, tambien rekonvertidos.

En Natal, kapitala del Rio Grande do Norte, fue kreada la Fundasion Ben Abraham ke, komo la "SHEMA" de Sao Paulo se dedika la estudio del fenomeno marrano i a ayudar los ke dezean realizar el largo viaje de retorno al djudaizmo de sus antepasados.

Este fenomeno, ke por falta de una mijor terminolojia yamo "djudios muevos", es un echo ke traversa las frontieras de paizes i kontinentes, podiendo ser observado en Espanya, Portugal, Brasil, Uruguay, Mexico, Estados Unidos i otros paizes ke resivieron los ekspulsados de Espanya i Portugal. Afin de poder estudiar este fenomeno i al mizmo tiempo ofreser ayudo espiritual a los desendientes de las viktimas de estas ekspulsiones el rabino Jacques Cukierkorn kere fondar un Instituto Internasional para el Estudio del Marranizmo - proyekto ke merese todo el apoyo nesesario para la realizasion de una ovra tan importante. El retorno al djudaizmo, para los kristianos-muevos ke lo dezean, es mas ke un derecho: se trata de una nesesidad personal en el kampo de la fe i un akto de djustisia a la memoria de muestros antepasados, martirizados por la intoleransia de una relijion  i los reyes de Espanya i Portugal.

Desdel punto de vista etiko, sosiolojiko, teolojiko i psikolojiko es nesesario entender el afan de tornar a un kamino ke tanta djente fue ovligada a abandonar. Si Freud tiene razon al afirmar -- en su letra al Bnei Brit -- ke los djudios tienen una "arkitektura psihika" diferensiada, lo ke los aze diferentes i en opozision a la sosiedad en la kuala biven, se puede entender ke los marranos, los kristianos muevos se sienten ainda desplasados i enkomodados en sus pozision de doble identidad, luchando entre sus dos identidades ke son, todas las dos inkompletas. En los meandros de la istoria postulada por Don Miguel de Unamuno, la erensia djudia no fue nunka olvidada entre la "djente de la nasion", los djudios konvertidos por la fuersa al kristianizmo ke kolonizaron el Meuvo Mundo. Ya yego la ora de azerles djustisia, a traves de la akseptasion de sus desendientes en la Tienda de Abraham.
 

Caesar Malta Sobreira (Yeuda Ben David)
Profesor de la Universidad de Rondonia (Brasil), aktualmente aziendo Doktorado en la Universidad de Salamanca, onde kontinua sus estudios sovre la Formasion Etnika i Kulturala del Nordeste Brasiliano.
 
 


History of the Sephardic Jews Main Page
Judeo-Spanish Language Main Page

Modern Romance Languages Main Page
Orbis Latinus Main Page

This page is part of Orbis Latinus
© Zdravko Batzarov