La "Henrietta Szold" la ultima nave ke partio de Gresia
kon imigrantes illegales para Erets Israel

Yitshak Kerem

(appeared in Aki Yerushalayim, Anyo 15, 1995 - No. 49, pp. 40-41).


La nave "Henrietta Szold" fue la ultima ke partio de Gresia en 1946, kon imigrantes illegales (ke no tenian sertifikato de imigrasion) para Erets Israel. Eya tenia a su bordo 531 olim - reskapados de los kampos de konsentrasion nazistas i de los eksperimentos medikales del Dr. Mengele i sus asosiados, miembros del Zonderkomando en Aushwitz Birkenau, soldados gregos ke kombatieron kontra los italianos en Albania, partizanes i reskapados de atakos antisemitas en Gresia - un grupo variado de personas ke sufrieron i fueron viktimas de duras trajedias a lo largo de un periodo de 15 anyos. En desparte de esto avia tambien unos kuantos djudios de la isla Xantos, salvados por milagro i ke no avian sido embiados a los kampos de eksterminasion en Polonia. Los lideres de todo este grupo eran Djako Razon, champion de boks de Gresia en pezgo mediano, en 1939, i ke fue tambien el organizador de matches de boks en el kampo de "Bone" (Aushwitz III), i Elazar Azarya, alto ofisier de la organizasion de partizanes siedristas E.L.A.S. - E.A.M. i fondador de una kooperativa en la rejion de Thessalia. Este grupo se organizo en tres kampamientos en la rejion de Atena. Siendo ke Djako Razon no permetia relasiones pre- maritales i komo konsekuensa de la presion sosiala, 12 pares se kazaron en uno de estos kampos. Ayi ya avia un grupo de famiyas kon chikos ninyos i mujeres prenyadas, ke no avian podido partir kon presedentes grupos de imigrantes illegales. Todos eran bien disiplinados, firmes en sus desizion de azer aliya i mizmo prontos a sufrir para esto. El grupo fue akompanyado por el Dr. Ezrati i su ija. Kuando la nave yego al golfo de Haifa eya fue reperada por los inglezes ke embiaron a su enkontro la nave de gerra Ajax, una destruktora ke avia partisipado en kombates navales de la II Gerra Mundiala i azia parte agora de la fuersa navala uzada por los inglezes para serrar las kostas de Erets Israel a la imigrasion illegala de olim djudios.

Los inglezes atakaron la nave kon fuertes chorros de agua a presion i bushkaron mizmo a remorkarla, atandole un grande kablo ma Djako Razon salto a la mar i reusho a kortarlo. En fin de kuento los inglezes reusheron a abordar la "Henrietta Szold" ma los marineros inglezes ke saltaron sovre el ponte de la nave enkontraron una fuerte rezistensia de los olim gregos ke los atakaron kon bokales, piedras i todo lo ke les kayo a la mano. Djako Razon i su grupo reusheron mizmo a apoderarsen de 12 marineros inglezes i tenerlos komo ostajes durante toda la noche.

Los komandantes del grupo ya savian ke no tenian grandes shanses de reushir. Al dia de despues los inglezes amenazaron de atakar la nave kon gaz. Despues ke Kipi i Shmuel, los reprezentates en la nave del komandamiento de la "Aliya B", yegaron a la konkluzion ke las vidas de los chikos ninios estavan en perikolo, desidieron de entregarsen. Los pasajeros fueron transferados a otra nave i fueron embiados a Kipros, djuntos kon un otro grupo de imigrantes illegales arestados un dia antes, a bordo de la nave Yagur. Despues de 4 mezes en un kampo inglez en Kipros, en Disiembre 1946, les fue permetido de azer sus aliya a Erets Israel.

En los livros sovre la "Haapala" (La Immigrasion Illegala a Erets Israel) se avla poko de los "Gid'onim", los telegrafistas ke akompanyavan a kada uno de estos grupos para mantener el kontakto kon Erets Israel. El telegrafista en esta nave era Yosef Lazarovski. Kuando fue tomada la desizion de renderse a los inglezes, yego un orden de echar el aparato a la mar, ma Lazarovski reusho a eskonderlo i tomarlo kon el a la nave Yagur i de ayi al kampo "Karlos" en Kipros onde, por medio de este aparato telegrafiko pudieron tener de muevo kontakto kon el paiz.

En komparasion kon las duras sufriensas ke pasaron los reskapados de los kampos de eksterminasion nazistas en Gresia, se puede dizir ke las sufriensas de los olim en el kampo de Kipros no fueron muy grandes, ma despues de anyos de vida en los kampos de konsentrasion, en teribles kondisiones, eyos kerian empesar en una mueva vida en Erets Israel i sus planos eran atrazados agora por unos kuantos mezes. La mizma armada ingleza ke libero a los djudios de Bergen-Belsen en 1945, los aprezava agora, en 1946. Djako Razon i munchos mas de su grupo ke vieron a los inglezes en estas dos situasiones no se espantavan de eyos i no se travavan de ekspresar sus deskontentez. Estos djudios de Gresia eran djente korajoza i malgrado todo lo ke pasaron no tenian miedo de las autoridades inglezas.

Para el estudio i el entendimiento de la Shoa es importante de akodrar i azer sovresalir en los muzeos ansi ke en los livros de istoria, la valor de estos eroes djudios de Gresia sovre los kualos ainda savemos muy poko solo.
 


History of the Sephardic Jews Main Page
Judeo-Spanish Language Main Page

Modern Romance Languages Main Page
Orbis Latinus Main Page

This page is part of Orbis Latinus
© Zdravko Batzarov