Refujiados de Gresia i Rodes en Maroko
durante la II Gerra Mundiala

por Yitshak Gershon

(appeared in Aki Yerushalayim, Anyo 15, 1995 - No. 49, pp.42-45.)


Antes de la II Gerra Mundiala i durante la gerra yegaron a Maroko un grande numero de refujiados djudios de Evropa, entre eyos  djudios de Gresia i Rodes tambien.

1. Los djudios de Rodes en Tanger

En el 7 de Septembre 1938 fue publikada en Italia la ley rasiala ke ordeno a los djudios ke tenian suditansas ajenas de deshar el paiz. En segito a esta ley munchos de los djudios de Rodes fueron ovligados a deshar la isla asta el 15 de Mayo 1939. En sus esforsos para toparles un refujio, la komunidad djudia de Rodes se adreso a la komunidad de Tanger, en el Norte de Maroko, ke era entonses una sivdad internasionala. En Tanger ya avia entonses numerozos refujiados djudios, prinsipalmente de Evropa Sentrala i desdel anyo 1936 avia ayi un komite espesial para ayudarles - el Komite Pro-refujiados. Este komite aksepto de tomar basho su responsabilidad unas 20 famiyas de rodeslis ke kontavan en todo unas 120 almas. Aki damos sus nombres tal ke fueron inkluidos en una lista del Joint, de 1944:  ..........

Kuando esbrocho la gerra yegaron a Tanger munchos refujiados mas, prinsipalmente suditos ajenos ke vinian de Fransia i entre eyos gregos tambien. En el enverano de 1940, en segito al sese de fuego entre Almanya i Fransia, Espanya se apodero de Tanger de manera unilaterala i anekso esta sivdad al protektorato espanyol en Afrika del Norte. Las autoridades espanyolas metio mas ostakolos a la entrada de ajenos a la sivdad ma esto podia ser echos ainda por numerozos kaminos el prinsipal de los kualos era la demanda de viza de entrada, por uno de los abitantes de Tanger para un pariente suyo. El komite i los refujiados eyos mizmos se sirvieron de este kamino para permeter a otros refujiados mas de yegar a la sivdad via Espanya o Portugal.

En komparasion kon el resto de maroko Tanger gozo de properidad ekonomika durante el periodo de la gerra i numerozos refujiados pudieron topar ayi lavoro o mizmo avrir negosios. Ma djuntos kon esto durante todo el periodo de la gerra uvo numerozos refujiados ke dependian del komite para sus mantenimiento. En 1941 el komite tenia 4 sentros onde moravan unos 100 refujiados, mientres ke munchas mas aresivian alokasiones mensuales para pagar sus kira de kaza. El komite tenia tambien una kuzina populara onde eran dados a los refujiados menesterozos tres komidas al dia. La komunidad kudio tambien por los menesteres medikales de los refujiados ensi ke por la edukasion de los chikos. Todo esto kon los fondos de la komunidad, "nedavot" espesiales paraŠlos refujiados arekojidas en las diversas komunidades del Norte de Maroko i alokasiones ke el Joint empeso a embiar verso la metad de la gerra.

Los refujiados de Gresia i de Rodes pudieron integrarsen en la sivdad i en la komunidad mas fasilmente ke los de Evropa Sentrala siendo ke avlavan djudeo-espanyol i la mayoria konosia el fransez tambien. Eyos pudieron tambien integrarsen mas fasilmente en los kales existientes i no tuvieron menester, segun fue el kavzo kon sus ermanso de Evropa Sentrala, de avrir muevos kales espesiales.

2. Los aprezados en los kampos

Al esborchar la gerra numerozos djudios ke bivian en Fransia komo apatrides, sin suditansa, i otros ke tenian suditansa ajena ma no podian o no kerian tornar a sus paiz, fueron ovligados a enlistarsen a la Lejion Ajena, para el periodo de la gerra, komo EVDG (Engagés Volontaires pour la Durée de la Guerre). Entre eyos avia tambien un sierto numero de djudios de Gresia. Eyos fueron embiados a entrenarsen en los kampos de la Lejion en el Sud de Fransia o en Afrika del Norte.Despues de la derrota de Fransia estos volontarios fueron demobilizados ma no devinieron sivdadinos libres sino ke fueron aprezados en kampos de lavoro, en Fransia i en Afrika del Norte en el kuadro de lo ke era yamado Groupements de Travailleurs Etrangers "Grupos de Lavorantes Ajenos". En fin de kuento, la mayoria de los ke estavan en Fransia fueron embiados en Fransia fueron embiados a los kampos de ekstemiansion en el Este de Evropa mientres ke los ke estavan en Afrika del Norte kedaron bivos, en sus mayoria, malgrado las duras kondisiones en las kualas bivieron. Por una ironia de la suerte, eyos pudieron sovrebivir aun ke no por sus inisiativa i kaje kontra sus propia voluntad. Los kampos onde avian sido konsentrados se topavan a lo largo de la linya de treno Trans-Sahariana, un viejo suenyo kolonial fransez ke el governo de Vichy bushko a realizar, prinsipalmente para butos de propaganda interna. Los prezioneros de estos kampos lavoravan largas oras kada dia, basho un sol kemador, sometidos a vengansas fizikas i moralas de sus guardianes i a duros kastigos para kada violasion de la disiplina ke a vezes se terminavan kon la muerte.  En segito a la operasion "Entorcha" en la kuala los aliados se apoderaron de Maroko i de Aljiria la mayoria de estos prizioneros fueron liberados en 1943. Una chika parte de entre eyos se enlisto komo voluntarios en las fuersas de Gran Britania i de la Fransia libre, ma la mayoria torno a las grandes sivdades de Maroko i  prinsipalmente a Kazablanka onde gozaron del ayudo del komite lokal de ayudo a los refujiados.

3. Los refujiados

El komite para refujiados fue fondado en Kazablanka en Djulio 1940, sovre la inisiativa personala de Helene Cazes- Benatar ke fue ayudada en esto, del punto de vista finansiario sovre todo por el konsejo de la komunidad. El komite se okupo de numerozos refujiados ke avian empesado a vinir de Fransia a Kazablanka, via Espanya, Portugal i Aljeria, desde EDjunio 1940 kuando firmado el armisitisio entre Fransia i Almanya i fue fondado el rejim de Vichy. Los refujiados vian en Maroko una eskala en sus emigrasion a un paiz libre prinsipalmente Estados Unidos. Ma la mayoria de entre eyos kedo en Kazablanka  largo tiempo i tuvo menester del ayudo del komite para topar lavoro, areglar sus dokumentos o resivir ayudo finansiario.

A la fin de la gerra el komite ayudo tambien a akeyos ke lo dezeavan a emigrar a otro paiz. La mayoria de entre los orijinarios de Gresia preferaron  retornar a Fransia i una chika minoria solo emigro a Estados Unidos i otros paizes del kontinente amerikano. Un sierto numero suvio a Erets Israel, a bordo de naves organizadas?? por el reprezentante del Departamento de Aliya de la Ajensia Djudia Fritzz Lichtenstein (mas tadre Perets Leshem). Estas naves ke salieron de Espanya embarkaron los refujiados en el porto de Tanger.

4. Los selaniklis en el kampo Marechal Lyautey

En segito a una operasion espanyola, en Fevrero de 1944 yegaron a Espanya kon treno espesial del kampo de konsentrasion Bergen-Belsen unos kuantos sienes de djudios selaniklis ke avian sido proklamados por el governo de Franco komo suditos espanyoles. En Espanya ya avia entonses unos kuantos miles de refujiados de los kualos se okupava la RSARO (Representation in Spain of the American Releif Organisations) ma ke aun kon esto eran un pezgo para la ekonomia de Espanya. En la Konferensia de Bermuda, en Avril 1943, onde fue tratado de esta kestion los aliados desidieron - afin de liberarsen de la presion para avrir a los refujiados las puertas de Estados Unidos o de Erets Israel - de fondar en Afrika del Norte un kampo de refujiados ke ayudaria a alivianar la karga ke eyos konstituiyan para Espanya. Despues de muncha tadria el kampo Marechal Lyautey fue fondado en Mayo 1944 en Fedala serka de Kazablanka. El avio sido prevista para 2000 personas ma no tuvo nunka mas de 800. El fue serrado a la fin del anyo 1944 despues ke Fransia fue liberada i ke Espanya kedo de ser el solo paiz por el kual podian salir los refujiados djudios de Evropa.

Al kampo Marechal Lyautey  yegaron la mayoria de los refujiados selaniklis ke estavan asta entonses en Espanya. Eyos bivieron en tiendas i las autoridades del kampo los okuparon en diferentes lavoros ansi ke en atelies onde embezaron komo  karpinteros i tenekedjis, sirviendosen komo materiales de viejas kashas de tavla i kutis de konserva. Para los ninios fue avierta una eskola ke sus maestros eran eyos tambien refujiados. Perets Leshem disho mas tadre ke se okupo de sus aliya a Erets Israel ma es difisil de akseptar esta version. En realidad fueron los inglezes ke transportaron estos refujiados verso el Este dispersandolos en los kampos de la UNWRA (Unites Nations Relief and Rehabilitation Administration). Solo una chika parte de entre eyos yegaron a Palestina onde fueron aprezados en el kampo de Nuseirat, serka de El Arish de onde fueron liberados poko a poko.

Munchos de entre los ke fueron dispersados en otros kampos retornaron en fin de kuento a Gresia o otros paizes de Evropa. No es klaro en ke mizura las institusiones sionistas konsideraron estos djudios komo kandidatos de aliya dezeables, ainda en lo ke estavan el kampo Marechal Lyautey. David Shaltiel, ke era shaliah del Departamento Politiko de la Ajensia Djudia en Fransia i en Afrika del Norte entre 1943-46, vijito en este kampo en Agosto en 1944 i en su raporto a las institusiones de la Ajensia en Londra en Novembre del mizmo anyo eskrivio:

"Vijiti en el kampo de refujiados de la UNWRA en Fedala onde avia 750 personas, 700 de eyas refujiados djudios de todas las partes de Evropa, prinsipalmente de Saloniko i otras partes de Gresia. Estos djudios son notables i komersantes selaniklis tipikos ke a mi opinion no konvienen para Palestina, mizmo en lo ke toka a los djovenes de entre eyos.

Aun kon esto munchos de entre eyos suvieron a Israel, traidos por los inglezes o por las Institusiones Sionistas, i en fin de kuento se aresentaron ayi.

Para munchos de los refujiados ke yegaron a Maroko durante la gerra este paiz fue un abrigo temporario. Este era un paiz prove i no un paiz ke podia apsorber emigrantes djudios de manera ke al terminarse la gerra munchos refujiados partieron a destinasiones mas prometientes: Amerika, Evropa i Israel. Solo en Tanger, ke en 1945 torno a ser una sivdad internasionala kedaron unos kuantos refujiados mizmo kuando ya les fue dada la posibilidad de partir, ma esto tambien fue por unos kuantos anyos solo.

Tomando en konsidereaion ls kondisiones ekonomikas i sosialas del djudaizmo de Maroko, ke tenia entonses munchos proves i personas sin lavoro, la kreasion de los komites de ayudo a los refujiados fue una inisiativa ke le aze onor.

1) Ver para mas detalios mi artikolo "Ayudo a los refujiados djudios en Maroko en la II Gerra Mundiala", Shorashim baMizrah B',  Yad Tabenkin 1989, paj. 314-327.
 



History of the Sephardic Jews Main Page
Judeo-Spanish Language Main Page

Modern Romance Languages Main Page
Orbis Latinus Main Page

This page is part of Orbis Latinus
© Zdravko Batzarov