El Sefardizmo

Dr. Albert de Vidas
Redaktor de "Erensia Sefardi"


El eskritor espanyol Miguel de Unamuno definio el lenguaje komo "la sangre de muestra alma". Ke mijor modo de deskrivir la intima relasion de los sefaradis kon sus lengua, el djudeo-espanyol? Uno es sinonimo del otro: no puedes ser sefaradi si tus parientes o tus avuelos no avlaron en muestra amada lengua.

Mizmo si pedrites el uzo del djudeo-espanyol tienes dainda en tu korason, en tu alma, el eskarinyo por este atadijo ke te izo parte de la nasion sefaradi.

Puede ser ke pedrites la kapachidad de guadrar esta lengua kuando tus avuelos se fueron a Portugal i de ayi se dispersaron por el Sud-Oeste de la Fransia, Holanda, Inglitiera i el kontinente amerikano. O la pedrites kuando se fueron a los estados italianos, al Norte del Maroko o al Imperio Otomano. Puede ser ke la pedrites kuando las eskolas de la Aliansa te ambezaron en fransez i te disheron ke tu lengua, el djudeo-espanyol, era muerto. Puede ser ke la pedrites kuando por razones ekonomikas, tu famiya se fue a l'Evropa del Oeste, a l'Afrika Sentrala o a l'Amerika del Norte. Puede ser ke la pedrites kuando el nasionalizmo linguistiko de los estados suksesores del Imperio Otomano te forsaron a embezar las lenguas lokales.

Ma onde kere ke sea, mizmo si te kazates kon alguno ke no es de "los muestros" i si no podias ambezar a tus kriaturas las pokas palavras de djudeo-espanyol ke te avias d'akodrar, en el fondo de tu alma guadrates el eskarinyo de esta lengua ke tomimos kon mozotros kuando salimos de Espanya en 1492. En verdad era una de las muy pokas kozas ke podiamos tomar kon mozotros!

I agora, este rekodro esta amenazado por algunas organizasiones i personas ke pretenden ke ser sefaradi es solo sinonimo de unos kuantos rituales djudios i de una manera partikulara de pronunsiar el ebreo, i nada mas. Para estas personas, muestra lengua, muestra erensia, muestras tradisiones, muestra kultura, muestra istoria, muestra manera de vida ke mantuvimos kon fidelidad durante los ultimos 500 anyos, no pezan del todo. Pretenden ke la lengua es nada i la relijion es todo. Yaman ansina komo sefaradis a muestros ermanos djudios "Mizrahim" ke vienen de Bokhara o de Marrakesh, de Damasko o de Teheran, de Basra o de Harrar, de Bombay o de San'a.

Es verdad ke eyos rogan komo mozotros, ke tienen los mizmos rituales, ma estas no son karakteristikas sefaradis, sino ke djudias.

Es la ultima inyoransia de kontinuar a insistir ke la nasion djudia tiene solo dos diviziones kulturalas importantes, los "sefaradis" i los "ashkenazis".

Las organizasiones i personas ke persisten en sus alhasaras simplistikas impiden el derecho de los sefaradis de identifikarsen no solo a traves sus relijion, sino ke tambien a traves sus erensia kulturala i espesialmente sus istoria.

La istoria de los sefaradis es klara. Fuimos desraigados de Espanya porke eramos djudios, ma mos yamamos sefaradis porke vinimos de Espanya i guadrimos bivas muestra lengua i muestra kultura espanyolas durante munchos siglos. Dinguno no mos deve rovar esto.

Ser sefaradis, para los ke salieron de Espanya i sus desendientes, no kere dezir solamente ser djudio, sino ke tambien ser el luzero de una tradision espanyola a la kuala mos apegimos por los ultimos 500 anyos.
 
 


Sephardic Society and Culture Main Page
Judeo-Spanish Language Main Page

Modern Romance Languages Main Page
Orbis Latinus Main Page

This page is part of Orbis Latinus
© Zdravko Batzarov