Opiniones

Seleksion de la revista djudeo-espanyola "Aki Yerushalayim" No. 50 (1995).


El termino "sefaradi" se topa ultimamente al sentro de una polemika muy animada. Frente a los ke pensan ke este termino se aplika a todos los djudios desendientes de los ekspulsados de Espanya i tambien a los ke achetaron sus ritual liturjiko i sus konsepsion de la 'Halaha (la ley relijioza djudia), ay ken insiste a achetar komo sefaradi solo a los desendientes de los djudios ekspulsados de Espanya i sovre todo los ke konservaron asta muestros dias sus tradisiones linguistikas i kulturalas espanyolas. Segun la primera de estas dos konsepsiones, sefaradis son tambien todos, o kaje todos los djudios de los paizes muzulmanos (los ke eran parte del Imperio Otomano i los de Afrika del Norte) mientres ke el termino ashkenazi se aplika a los djudios del Norte de Evropa i los ke emigraron de ayi a otras partes del mundo.

En realidad la situasion aktuala es muncho mas komplikada para ke pueda konformarse a esta simple division, siendo ke ay klaramente grandes komunidades djudias de paizes muzulmanos, komo los yemenitas, o de paizes no muzulmanos, komo los etiopianos i los djudios de Cochin en India, ke no se konsideran sefaradis sino ke tienen sus tradisiones espesifikas.

Kual es entonses el kriterio mas valable para definir ken es sefaradi? El relijiozo, bazado sovre el ritual liturjiko i otras tradisiones relijiozas? El istoriko, de atadijo direkto kon los expulsados de Espanya? O el linguistiko, de konosensia del djudeo-espanyol avlado por los desendientes de los djudios ekspulsados de Espanya ke se aresentaron prinsipalmente en Turkia i en los Balkanes? O bien es ke seria mejor akseptar una konbinasion de todos estos kriterios?

A la demanda de algunos kolaboradores avrimos agora las pajinas de Aki Yerushalayim a los ke keren ekspresar sus opiniones i puntos de vista a este sujeto i publikamos por empesar el artikolo ke mos fue embiado por el redaktor de Erensia Sefaradi, el Dr. Albert de Vidas, estando siguros ke en los sigientes numeros tambien de la revista tendremos artikolos sovre esta kestion o sovre otros temas importantes ke tokan a la kultura sefaradi i a la djudeo-espanyola mas partikularmente.
 



Sephardic Society and Culture Main Page
Judeo-Spanish Language Main Page

Modern Romance Languages Main Page
Orbis Latinus Main Page

This page is part of Orbis Latinus
© Zdravko Batzarov