Entrevista kon el Sr Yitshak Navon

Publicada en "Aki Yerushalayim" No. 50 (1995).


Diplomato, sekretario politiko de Ben Gurion, Miembro de la Keneset i mas tadre Vise-Prezidente de muestro Parlamento i enfin Prezidente del Estado entre los anyos 1978-1983, Yitshak Navon es siguramente la personalidad israeli mas identifikada kon el djudaizmo sefaradi. Autor de dos ovras de teatro ke tratan del folklor sefaradi, Yitshak Navon fue tambien prezidente del Konsejo Publiko Israeli "Sefarad 92" ke promovio i koordino los programas kon los kualos fue konmemorado el V Sentenario de la Ekspulsion de los Djudios de Espanya. Dos anyos despues del 1992 ke sovresalio sigun se save por una intensa aktividad en este kampo, en Israel ansi ke en otras partes del mundo, demandimos del Sr Navon de akordarmos una entrevista para avlar de lo ke fue echo a este sujeto i sovre otros temas atados a la kultura del djudaizmo sefaradi.
 

Aki Yerushalayim - Sr. Navon, podria dizirmos en ke mizura lo ke fue echo en Israel en el kuadro de Sefarad '92 respondio mas o menos a sus esperansas i previziones en este kampo?

Yitshak Navon - Yo no me imajini mizmo ke ivamos azer tantas kozas! I no fue en el '92 solo. Empesimos en muestros aparejos ainda unos kuantos anyos antes de esto...Por enshemplo, la seria de programas sovre la istoria de los djudios de Espanya i de Portugal ke yo prezenti en la Televizion Israeli tomo 2-3 anyos, desde ke se empeso a avlar de eya i a planearla i asta ke fueron mostrados sus 8 kapitolos. En desparte de esto, no uvo eskola en Israel ke sus elevos no izieron en el '92 un lavoro sovre la istoria i la kultura de los sefaradis. Fueron publikados livros i artikolos, fueron organizados kongresos i konferensias sientifikas, uvo konsertos i ekspozisiones i mas i mas. Lo interesante es ke no fueron solo los sefaradis, sino ke todas las komunidades partisiparon i se interesaron en toda esta aktividad.

Aki Yerushalayim - Es ke todo esto fue echo kon el buto de konmemorar solamente el V Sentenario de la Ekspulsion o es ke pudieron ser logrados otros rezultados tambien, ke sean mas duraderos i den sus frutos en los sigientes anyos tambien.

Yitshak Navon - Es klaro ke los rezultados de todo lo ke fue echo kon esta okazion seran konsentidos en el futuro tambien. En primer lugar, oy ninguno no puede dizir ke kere konoser la istoria de los sefaradis ma no tiene livros ke le permetan de estudiarla. Ay una muchidumbre de livros i artikolos no solo sovre la istoria sino ke sovre la literatura, el folklor i numerozos otros aspektos de la kultura sefaradi i todo el ken kere anchear sus konosensias en estos kampos puede azerlo muncho mas fasilmente ke pokos anyos atras.

I no es solo esto. El intereso enverso estos temas no se limita a Israel solamente sino ke se konsiente en munchos paizes mas. Aun ke ya pasaron 2 anyos despues del '92, ainda son echos kongresos i simpozios, son publikados livros, artikolos i mas ke kontinuan a tratar de estas kestiones i a enrikeser muestras konosensias en este kampo.

Aki Yerushalayim - Es verdad ke toda esta aktividad mos esta permetiendo agora de mijor konoser la istoria i la kultura del djudaizmo sefaradi ansi ke de sus antepasados, los djudios de Espanya, i tambien de azer estudios ke mos ayuden a entenderlos i a responder a algunas de las demandas ke mos azemos a sus sujeto - por enshemplo, kualo es lo ke tenian de partikular estos djudios ke les permetio de dezvelopar una de las kulturas mas adelantadas i floresientes de sus epoka? Podria dizirmos, Sr. Navon, kualas eran, a su opinion, las karakteristikas del djudaizmo espanyol ke le permetieron de lograr estos alkanses?

Yitshak Navon - A mi opinion ay tres kozas ke karakterizan a los djudios de Espanya.

Prima: La konvivensia ke reusheron a lograr entre la fe i la sensia: la posibilidad ke eyos tenian de estudiar la Ley i al mizmo tiempo la sensia i la filozofia. Uno podia muy bien ser rabino i okuparse al mizmo tiempo de matematika... Podia estudiar el Talmud i la filozofia, sigun era echo por enshemplo, por grandes rabinos komo Arambam i otros mas. Esta sinteza ke reusheron a azer los djudios de Espanya entre la relijion i la sensia es, sigun mi, sus karakteristika mas importante.

Sigunda: No avia onde eyos ekstremos. Eyos bushkavan siempre el kamino de en medio, eran mas liberales i perkuravan ke la observasion de la ley sea mas kolay. I komo onde eyos la Ley no era muy dura, no uvo reaksion...Onde los sefaradis no uvo Reforma, porke no avia menester.

Tresera: La djente tenia muncho amor por la lengua ebrea, la estudiavan i la uzavan para eskrivir sus livros i poemas. Es en Espanya ke fue kreada la gramatika ebrea. Estas fueron las karakteristikas de los djudios de Espanya no solo kuando bivieron en este paiz sino ke despues de la ekspulsion tambien. Eyos las tomaron kon si a todo lugar onde fueron a establesersen i makare, makare, ke los djudios aki en Israel tengan eyos tambien estas.
 



Sephardic Society and Culture Main Page
Judeo-Spanish Language Main Page

Modern Romance Languages Main Page
Orbis Latinus Main Page

This page is part of Orbis Latinus
© Zdravko Batzarov